ജസീന്ത ആര്‍ഡൻ രാജി പ്രഖ്യാപിച്ചതോടെ ന്യൂസിലൻ്റിന് പുതിയ പ്രധാനമന്ത്രിയെത്തുന്നു. ക്രിസ് ഹിപ്കിന്‍സ് അടുത്ത പ്രധാനമന്ത്രിയാകുമെന്ന് സിഎന്‍എന്‍ അടക്കമുള്ള മാധ്യമങ്ങള്‍ റിപ്പോര്‍ട്ട് ചെയ്തു. ലേബര്‍ പാര്‍ട്ടിയുടെ നേതൃത്വത്തിലേക്കുള്ള ഏക നാമനിര്‍ദേശം ക്രിസ് ഹിപ്കിന്‍സ് ആയിരുന്നുവെന്നാണ് വിവരം.
ക്രിസിൻ്റെ പേര് സ്ഥിരീകരിക്കുന്നതിനും നാമനിര്‍ദേശം അംഗീകരിക്കുന്നതിനുമായി ഞായറാഴ്ച ഉച്ചയോടെ യോഗം ചേരുമെന്ന് ലേബര്‍ പാര്‍ട്ടി വിപ് ഡങ്കന്‍ വെബ് പ്രസ്താവനയില്‍ വ്യക്തമാക്കി. രാജി പ്രഖ്യാപിച്ച ജസീന്ത ആര്‍ഡന്‍ ഔദ്യോഗികമായി സ്ഥാനമൊഴിയുന്നതോടെ ക്രിസ് ഹിപ്കിന്‍സ് അടുത്ത പ്രധാനമന്ത്രിയാകും. വ്യാഴാഴ്ചയായിരുന്നു ജസീന്തയുടെ രാജി പ്രഖ്യാപനം.
ലേബര്‍ പാര്‍ട്ടി അംഗം മൈക്കല്‍ വുഡ് അടക്കമുള്ളവരുടെ പേരുകള്‍ നിര്‍ദേശിക്കുമെന്ന് സൂചനകളുണ്ടായിരുന്നിട്ടും ക്രിസിൻ്റെ പേര് മാത്രമാണ് അവസാനം പരിഗണിച്ചത്. നിലവില്‍ ന്യൂസിലൻ്റ് മന്ത്രിസഭയില്‍ പൊലീസ് വകുപ്പും വിദ്യാഭ്യാസ വകുപ്പും കൈകാര്യം ചെയ്യുന്ന മന്ത്രിയാണ് ക്രിസ് ഹിപ്കിന്‍സ്.
ജസീന്തയുടെ വിശ്വസ്തരായ സഹപ്രവര്‍ത്തകനായിരുന്ന ക്രിസ്, കൊവിഡ് പ്രതിസന്ധി സമയത്ത് മികച്ച പ്രവര്‍ത്തനങ്ങളിലൂടെ ജനശ്രദ്ധ പിടിച്ചുപറ്റി. 44 കാരനായ ക്രിസ് 2008 മുതല്‍ പാര്‍ലമെൻ്റ് അംഗമാണ്.
