പാരീസ് ഒളിമ്പിക്‌സിലെ പുരുഷ ഹോക്കിയിൽ ഇന്ത്യയ്ക്ക് നിരാശ. സെമിയിൽ ജർമനിക്ക് മുന്നിൽ ഇന്ത്യയ്ക്ക് പരാജയം സമ്മതിക്കേണ്ടി വന്നു. രണ്ടിനെതിരെ മൂന്ന് ഗോളുകൾക്കായിരുന്നു ജർമനിയുടെ ജയം. ഇതോടെ നാളെ നടക്കുന്ന വെങ്കല മെഡൽ പോരാട്ടത്തിൽ ഇന്ത്യ സ്പെയിനെ നേരിടും.
സെമി ഫൈനലിൽ ജർമനിക്കെതിരെ സമനില ഗോളിനായുള്ള അവസാന നിമിഷത്തെ ശ്രമവും പരാജയപ്പെട്ട് തോൽവി ഏറ്റുവാങ്ങിയതോടെ ഇന്ത്യൻ താരങ്ങൾ കണ്ണീരണിഞ്ഞു. വിജയ പ്രതീക്ഷയോടെ ഒരു ഗോളിന് മുന്നിട്ടുനിന്ന ശേഷമായിരുന്നു ഇന്ത്യ തോൽവി സമ്മതിച്ചത്. പി.ആർ. ശ്രീജേഷ് ഉൾപ്പെടെയുള്ളവരെ സംബന്ധിച്ച് ഒളിംപിക്സ് സ്വർണമെന്ന കരിയറിലെ സുവർണമോഹമാണ് തകർന്നത്.
ഒളിംപിക്സിന്റെ തുടക്കത്തിൽത്തന്നെ വിരമിക്കൽ പ്രഖ്യാപിച്ച ശ്രീജേഷിനെ ഇനിയൊരു ഒളിംപിക്‌സിൽ കാണാൻ സാധിക്കില്ലെന്നതാണ് കായിക ലോകത്തെ മറ്റൊരു വേദന.
