ട്വന്റി20 ലോകകപ്പ് കിരീടവുമായി ഇന്ത്യൻ താരങ്ങൾ നാളെ നാട്ടിലെത്തും. താരങ്ങളെ അഭിനന്ദിക്കാൻ നേരിട്ടെത്തുമെന്ന് അറിയിച്ചിരിക്കുകയാണ് പ്രധാനമന്ത്രി നരേന്ദ്രമോദി. വൻ വിജയവുമായി ഇന്ത്യൻ മണ്ണിലേയ്ക്ക് മടങ്ങിയെത്തുന്ന താരങ്ങളെ നേരിട്ടുകാണാൻ മോദി അവസരമൊരുക്കുകയായിരുന്നു.
പ്രധാനമന്ത്രിയുമായുള്ള കൂടിക്കാഴ്ചയ്ക്ക് ശേഷം ട്രോഫിയുമായി താരങ്ങൾ മുംബൈ നഗരത്തിൽ റോഡ് ഷോ നടത്തും. അതിനു ശേഷം ബിസിസിഐ പ്രഖ്യാപിച്ച 125 കോടി സമ്മാനത്തുക ടീമിന് കൈമാറുകയും ചെയ്യും. ആഘോഷങ്ങൾക്ക് ശേഷം ഇന്ത്യൻ താരങ്ങൾ സിബാബ്‌വെയിലെ ഹരാരെയിലെത്തി ടീമിനൊപ്പം ചേരാനാണ് തീരുമാനം.
ബിസിസിഐ ഏർപ്പാടാക്കിയ പ്രത്യേക വിമാനത്തിലാണ് ഇന്ത്യൻ ക്രിക്കറ്റ് താരങ്ങൾ ബാർബഡോസിൽ നിന്ന് ഇന്ന് നാട്ടിലേക്ക് തിരിച്ചത്. നാളെ അതിരാവിലെയാണ് ഇന്ത്യൻ ടീം ഡൽഹിയിൽ വിമാനമിറങ്ങുക. ശനിയാഴ്ച ദക്ഷിണാഫ്രിക്കയെ തോൽപിച്ച് ടി20 ലോകകപ്പ് കിരീടം നേടിയ ഇന്ത്യൻ താരങ്ങൾ ഞായറാഴ്‌ച തന്നെ ബാർബഡോസിൽ നിന്ന് മടങ്ങാനിരുന്നതാണ്. എന്നാൽ ബെറിൽ ചുഴലിക്കാറ്റ് ഭീഷണിയെ തുടർന്ന് ബാർബഡോസിലെ വിമാനത്താവളം അടച്ചുപൂട്ടിയതോടെ താരങ്ങൾ അവിടെ കുടുങ്ങുകയായിരുന്നു.
