യുഎഇയിൽ താപനില 50 ഡിഗ്രി സെൽഷ്യസിന് തൊട്ടടുത്തെത്തി. ഇന്ന് താപനില 49 ഡിഗ്രി സെൽഷ്യസിൽ എത്തുമെന്ന് കാലാവസ്ഥാ നിരീക്ഷണ കേന്ദ്രത്തിൻ്റെ മുന്നറിയിപ്പ്. ചില തീരപ്രദേശങ്ങളിൽ ശനി രാത്രിയിലും ഞായറാഴ്ച രാവിലെയും ഈർപ്പം ഉള്ളതായിരിക്കുമെന്നും വാഹനമോടിക്കുന്നവർ ജാഗ്രത പാലിക്കണമെന്നും മുന്നറിയിപ്പിൽ പറയുന്നു.
അബുദാബി പോലീസും ഇത് സംബന്ധിച്ച് വാഹന യാത്രക്കാർക്ക് മുന്നറിയിപ്പ് നൽകിയിട്ടുണ്ട്.വാഹനമോടിക്കുന്നവർ വേഗം കുറയ്ക്കണമെന്നും സുരക്ഷാ മാർഗനിർദേശങ്ങൾ പാലിക്കണമെന്നും അധികൃതർ നിർദേശിച്ചു. ചൂടേറുന്ന പശ്ചാത്തലത്തിൽ ജൂൺ 15 മുതൽ ഉച്ചവിശ്രമ നിയമം പ്രഖ്യാപിച്ചിട്ടുണ്ട്.
യു.എ.ഇയ്ക്ക് പുറമെ മറ്റ് ജിസിസി രാജ്യങ്ങളിലും ചൂട് അതികഠിനമാവുകയാണ്. സൌദിയിലും ചൂട് 50 ഡിഗ്രിയോട് അടുക്കുകയാണ്. അതേസമയം ചൂടേറിയതോടെ കുവൈത്തിൽ ഇന്ന് മുതൽ നിർബന്ധിത ഉച്ചവിശ്രമം പ്രാബല്യത്തിൽ വന്നു. രാവിലെ 11 മണിമുതൽ 4 മണിവരെയാണ് നിയന്ത്രണം.
