ദേവതയേപ്പോലെ അണിഞ്ഞൊരുങ്ങി ഹൽദി ആഘോഷമാക്കി നടി അപർണ ദാസ്. താരത്തിന്റെ ഹൽദി ആഘോഷങ്ങളുടെ ചിത്രങ്ങളും വീഡിയോകളും സമൂഹ്യ മാധ്യമങ്ങളിൽ വൈറലാകുകയാണ്. കുടുംബാംഗങ്ങൾക്കും അടുത്ത സുഹൃത്തുക്കൾ‍ക്കുമൊപ്പം ആഘോഷിക്കുന്ന ചിത്രങ്ങൾ ഇൻസ്റ്റഗ്രാമിലൂടെ നടിയും പങ്കുവെച്ചിട്ടുണ്ട്. നാളെ വടക്കാഞ്ചേരിയിൽ വെച്ചാണ് അപർണയുടെ കഴുത്തിൽ നടൻ ദീപക് പറമ്പോൽ താലി ചാർത്തുക. ഏറെ നാളത്തെ പ്രണയത്തിന് ശേഷമാണ് ഇരുവരും ഒന്നിക്കുന്നത്.
ഞാൻ പ്രകാശൻ എന്ന സിനിമയിലൂടെ അഭിനയരംഗത്തെത്തിയ അപർണ ‘മനോഹരം’ എന്ന സിനിമയിലൂടെയാണ് പ്രേക്ഷകശ്രദ്ധ നേടുന്നത്. ഈ ചിത്രത്തിൽ അപർണയ്ക്കൊപ്പം ദീപക് പറമ്പോലും ഒരു പ്രധാന കഥാപാത്രത്തെ അവതരിപ്പിച്ചിരുന്നു. ഇതോടെയാണ് ഇരുവരും പ്രണയത്തിലായതെന്നാണ് സൂചന. മലയാളത്തിന് പുറമെ ബീസ്‌റ്റ്, ഡാഡ എന്നീ തമിഴ് ചിത്രങ്ങളിലും ആദികേശവയിലൂടെ തെലുങ്കിലും അപർണ അരങ്ങേറ്റം കുറിച്ചു. സീക്രട്ട് ഹോം ആണ് അപർണയുടെ അവസാനം റിലീസ് ചെയ്ത സിനിമ.
വിനീത് ശ്രീനിവാസൻ്റെ മലർവാടി ആർട്ട്സ് ക്ലബ് എന്ന സിനിമയിലൂടെയാണ് ദീപക് പറമ്പോൾ മലയാള സിനിമയിലേയ്ക്കെത്തുന്നത്. തുടർന്ന് തട്ടത്തിൻ മറയത്ത്, തിര, ഡി കമ്പനി, കുഞ്ഞിരാമായണം, ഒരേ മുഖം, ദി ഗ്രേറ്റ് ഫാദർ, രക്ഷാധികാരി ബൈജു തുടങ്ങി നിരവധി ചിത്രങ്ങളിലാണ് ദീപക് വേഷമിട്ടത്. ഇപ്പോൾ തിയേറ്ററിൽ തരംഗം സൃഷ്ടിക്കുന്ന ‘മഞ്ഞുമ്മൽ ബോയ്‌സ്’ ആണ് ദീപക്കിൻ്റേതായി ഒടുവിൽ ഇറങ്ങിയ ചിത്രം. ‘വർഷങ്ങൾക്ക് ശേഷം’ എന്ന ചിത്രമാണ് നടന്റേതായി റിലീസ് ചെയ്യാനുള്ള ചിത്രം.
