ചെറിയ പെരുന്നാൾ ആഘോഷങ്ങൾ ഗംഭീരമാക്കാൻ ഒരുങ്ങിയിരിക്കുകയാണ് അബുദാബി. ആഘോഷങ്ങളുടെ ഭാഗമായി എമിറേറ്റിലെ വിവിധ സ്ഥലങ്ങളിൽ കരിമരുന്ന് പ്രദർശനങ്ങളാണ് സംഘടിപ്പിക്കുക. അബുദാബി കൾച്ചർ ആന്റ് ടൂറിസം വകുപ്പിന്റെ കീഴിൽ പ്രവർത്തിക്കുന്ന എക്സ്പീരിയൻസ് അബുദാബിയാണ് പ്രദർശനം ഒരുക്കുന്നത്.
പെരുന്നാൾ ദിനമായ നാളെ രാത്രി 9 മണി മുതലാണ് കരിമരുന്ന് പ്രകടനങ്ങൾ മാനത്ത് വിരിയുക. അബുദാബി കോർണിഷ്, ഹുദൈരിയത് ഐലൻഡ്, ഹസ ബിൻ സായിദ് സ്റ്റേഡിയം, അൽ ഐൻ, മദിനത് സായിദ് പബ്ലിക് പാർക്ക്, അൽ ദഫ്‌റ, ഗയതി, അൽ ദഫ്‌റ, അൽ മുഗൈരാ ബീച്ച്, അൽ ദഫ്‌റ എന്നിവിടങ്ങളിൽ നാളെയും യാസ് ബേ, യാസ് ഐലൻഡ് എന്നിവിടങ്ങളിൽ നാളെ മുതൽ ഏപ്രിൽ 12 വരെയും കരിമരുന്ന് പ്രദർശനം നടക്കും.
ഇതിനുപുറമെ പെരുന്നാളിന്റെ മൂന്ന് ദിവസങ്ങളിൽ സാംസ്കാരിക പരിപാടികൾ, വിനോദം, വിവിധ സ്റ്റേ‍ജ് ഷോകൾ, കുതിര സവാരികൾ തുടങ്ങി നിരവധി പരിപാടികളാണ് പൊതുജനങ്ങൾക്കായി അബുദാബിയിൽ ഒരുക്കിയിരിക്കുന്നത്. ജനങ്ങൾക്ക് മറക്കാനാകാത്ത അവിസ്മരണീയ മുഹൂർത്തങ്ങൾ സമ്മാനിക്കുന്നതിന്റെ ഭാഗമായാണ് വിവിധ പരിപാടികൾ സംഘടിപ്പിക്കുന്നത്.
