സഹോദരി പൂജ കണ്ണൻ്റെ വിവാഹ നിശ്ചയത്തിൽ തിളങ്ങി സായ് പല്ലവി. തന്റെ ഇഷ്ട വേഷമായ സാരിയിൽ തന്നെയാണ് താരസുന്ദരി വിവാഹ നിശ്ചയത്തിൽ പങ്കെടുത്തത്. കുടുംബത്തിനൊപ്പം ചടങ്ങിൽ പങ്കെടുത്ത ശേഷം നൃത്തം ചെയ്ത് ആഘോഷിക്കുന്ന സായ് പല്ലവിയുടെ വീഡിയോയും ചിത്രങ്ങളും സമൂഹമാധ്യമങ്ങളിൽ വൈറലായിട്ടുണ്ട്.
വിനീത് ആണ് പൂജയുടെ ഭാവി വരൻ. കഴിഞ്ഞ ദിവസം വിനീതിനെ പരിചയപ്പെടുത്തി ഇൻസ്റ്റഗ്രാമിൽ പൂജ വീഡിയോയും പങ്കുവെച്ചിരുന്നു. ആൽബം, ഹ്രസ്വചിത്രം എന്നിവയിലൂടെ അഭിനയ രംഗത്തെത്തിയ പൂജ ചിത്തിര സെവാനം എന്ന സിനിമയിലും അഭിനയിച്ചിട്ടുണ്ട്. നിരവധി പേരാണ് ഇരുവർക്കും ആശംസകൾ നേരുന്നത്.
അതേസമയം, അനുജത്തി വിവാഹിതയാകുകയാണെന്നും എന്നാണ് സായ് പല്ലവിയുടെ വിവാഹം എന്നുമാണ് ആരാധകരുടെ ചോദ്യം. എസ്കെ 21, രാമായണ, തണ്ടേൽ തുടങ്ങിയ ചിത്രങ്ങളാണ് സായ് പല്ലവിയുടെതായി ഇനി റിലീസ് ചെയ്യാനുള്ള ചിത്രങ്ങൾ.
