മിശ്ര വിവാഹിതർക്ക് 30,000 രൂപയുടെ ധനസഹായം നൽകുമെന്ന് സാമൂഹ്യ നീതി വകുപ്പ്. 12.52 കോടി രൂപയാണ് ഇതിനായി സർക്കാർ അനുവദിച്ചിരിക്കുന്നത്. 2021 വരെയുള്ള കാലയളവിൽ വിവാഹിതരായിട്ടുള്ള 4,170 ഓളം വരുന്ന മിശ്ര വിവാഹിതർക്കാണ് ധനസഹായം ലഭിക്കുക. എസ് സി /എസ് ടി വിഭാഗത്തിൽ പെട്ടവരല്ലാത്ത, സാമ്പത്തിക ബുദ്ധിമുട്ട് അനുഭവിക്കുന്ന മിശ്ര വിഹാഹിതരായ ദാമ്പതികൾക്ക് മാത്രമേ അപേക്ഷിക്കാൻ സാധിക്കുകയുള്ളു.
തദ്ദേശ സ്വയംഭരണ സ്ഥാപനങ്ങളായ ബ്ലോക്ക്‌ പഞ്ചായത്തുകൾ, മുനിസിപാലിറ്റികൾ, കോർപറേഷനുകൾ തുടങ്ങിയ സ്ഥാപനങ്ങൾ വഴിയായിരിക്കും ധനസഹായവുമായി ബന്ധപ്പെട്ട അപേക്ഷകൾ സ്വീകരിക്കുക. അതേ സമയം അപേക്ഷകരുടെ വാർഷിക വരുമാനം ഒരു ലക്ഷം രൂപയ്ക്ക് താഴെയായിരിക്കുകയും വേണം. വോട്ടർ ഐഡി, ആധാർ, വിവാഹം രജിസ്റ്റർ ചെയ്ത സർട്ടിഫിക്കറ്റ് എന്നീ രേഖകൾ അപേക്ഷയ്ക്കൊപ്പം സമർപ്പിക്കണം. ആലപ്പുഴ ജില്ലയിൽ നിന്നാണ് 833 പേർ, ഏറ്റവും കൂടുതൽ അപേക്ഷകർ ഇതിനോടകം തന്നെ നിശ്ചിത സ്ഥാപനങ്ങളിൽ നൽകിയിട്ടുള്ളത്. ഏറ്റവും കുറവ് അപേക്ഷകൾ മലപ്പുറത്തുനിന്നുമാണ്, 37 പേർ
2021- 22 സാമ്പത്തിക വർഷത്തിൽ സർക്കാർ 1.45 കോടി രൂപ 485 അപേക്ഷകൾക്കായി മാറ്റി വച്ചിരുന്നു എന്നാൽ, 4,170 അധിക അപേക്ഷകൾ കൂടിയുണ്ടെന്ന കണക്കെടുപ്പിലാണ് സാമൂഹ്യ നീതി വകുപ്പ് പുതിയ ധനസഹായ തുക പ്രഖ്യാപിച്ചത്. സ്വന്തമായി സംരംഭം തുടങ്ങുവാനോ, വീട്, ഭൂമി തുടങ്ങിയവ വാങ്ങുവാനോ വേണ്ടി മാത്രമേ ഈ ധനസഹായ തുക വിനിയോഗിക്കാൻ പാടുള്ളു എന്ന് സാമൂഹ്യ നീതി വകുപ്പ് അറിയിച്ചു.
