മനുഷ്യക്കടത്തിനും ഗാർഹിക പീഡനത്തിനും ഇരയായവർക്ക് സൗജന്യ സമ്പൂർണ ആരോഗ്യ പരിരക്ഷ പദ്ധതിയുമായി അബുദാബി. നാഷണൽ ഹെൽത്ത് ഇൻഷുറൻസ് കമ്പനിയായ ദമനുമായി സഹകരിച്ചാണ് പദ്ധതി. ഇത് സംബന്ധിച്ച് അബുദാബിയിലെ കമ്മ്യൂണിറ്റി ഡെവലപ്‌മെന്റ് ഡിപ്പാർട്ട്‌മെന്റിന്റെ അഫിലിയേറ്റ് ആയ അബുദാബി സെന്റർ ഫോർ ഷെൽട്ടറിംഗ് ആൻഡ് ഹ്യൂമാനിറ്റേറിയൻ കെയറുമായി ദമൻ ധാരണാപത്രത്തിൽ ഒപ്പുവച്ചു.
മനുഷ്യക്കടത്തിനും ഗാർഹിക പീഡനത്തിനും ഇരയായവർക്ക് പരിചരണവും പുനരധിവാസവും തൊഴിലധിഷ്ഠിത പരിപാടികളും നൽകുന്നിവരുന്ന അഭയകേന്ദ്രമാണ് അബുദാബി സെന്റർ ഫോർ ഷെൽട്ടറിംഗ് ആൻഡ് ഹ്യൂമാനിറ്റേറിയൻ കെയര്‍ -ഈവ. ഈവയുടെ കീ‍ഴിലുളളവര്‍ക്കാണ് ദമന്‍ ഇന്‍ഷുറന്‍സ് പരിരക്ഷ ലഭിക്കുക. സേവനം ആവശ്യമുളളവരുടെ ആരോഗ്യ പരിരക്ഷ പ്രധാനമാണെന്ന നിഗമനത്തിലാണ് ഇന്‍ഷുറന്‍സ് പരിരക്ഷ ഏര്‍പ്പെടുത്തിയത്.
ദമനുമായുള്ള ദീർഘകാല പങ്കാളിത്തത്തിന്റെ പരിസമാപ്തിയാണ് ധാരണാപത്രമെന്ന് അബുദാബി സെന്റർ ഫോർ ഷെൽറ്ററിംഗ് ആൻഡ് ഹ്യുമാനിറ്റേറിയൻ കെയർ ഡയറക്ടർ ജനറൽ ഹെർ എക്സലൻസി സാറാ ഷുഹൈൽ പറഞ്ഞു. എല്ലാവർക്കും ആരോഗ്യപരിരക്ഷ ലഭ്യമാക്കുന്നതിനുള്ള ദേശീയ ശ്രമങ്ങളെ പിന്തുണയ്‌ക്കുന്നതിന്‍റെ ഭാഗമായാണ് കരാറെന്ന് നാഷണൽ ഹെൽത്ത് ഇൻഷുറൻസ് കമ്പനി – ദമാൻ സിഇഒ ഹമദ് അൽ മെഹ്യാസും വ്യക്തമാക്കി.
ഗുണഭോക്താക്കളുടെ സ്വകാര്യത സംരക്ഷിച്ചുകൊണ്ട് സ്വയംപര്യാപ്തതയിലേക്ക് നയിക്കുക എന്നതാണ് ഈവ ലക്ഷ്യംവയ്ക്കുന്നത്. ഇതിനായി പ്രാദേശിക, ഫെഡറൽ, അന്തർദേശീയ പങ്കാളികളികളുടെ സഹകരണവും ഈവ ഉറപ്പാക്കും. 2008 ലാണ് ഈവയുടെ ആദ്യ ഷെല്‍ട്ടര്‍ പ്രവര്‍ത്തനം ആരംഭിച്ചത്.
