സൗദി ആഭ്യന്തര മന്ത്രാലയത്തിന്റെ ആക്ടിംഗ് അണ്ടർസെക്രട്ടറി ലഫ്റ്റനന്റ് ജനറൽ സുലൈമാൻ അൽ-യഹ്‌യ മന്ത്രാലയത്തിന്റെ അബ്‌ഷർ പ്ലാറ്റ്‌ഫോം വഴി സിവിൽ സ്റ്റാറ്റസ് വകുപ്പിന്റെ പുതിയ ഇലക്ട്രോണിക് സേവനങ്ങൾ ഉദ്ഘാടനം ചെയ്തു.
ഈ സേവനങ്ങളിൽ സൗദികളുടെയും പ്രവാസികളുടെയും ഡിജിറ്റൽ ജനന സർട്ടിഫിക്കറ്റുകളുടെയും മരണ സർട്ടിഫിക്കറ്റുകളുടെയും പ്രദർശനവും സ്ഥിരീകരണ സേവനങ്ങളും ഉൾപ്പെടുന്നു. ഡിജിറ്റൽ ജനന സർട്ടിഫിക്കറ്റ് ഡിസ്പ്ലേ സേവനം, മരണ സർട്ടിഫിക്കറ്റ് വിതരണം, ഡിസ്പ്ലേ സേവനം, ഡിജിറ്റൽ ജനന-മരണ സർട്ടിഫിക്കറ്റ് വെരിഫിക്കേഷൻ സേവനം എന്നിവയാണ് പുതിയ സേവനങ്ങളിൽ ഉൾപ്പെടുത്തിയിരിക്കുന്നതെന്ന് സിവിൽ സ്റ്റാറ്റസ് വകുപ്പ് അറിയിച്ചു.
റിയാദിലെ ആഭ്യന്തര മന്ത്രാലയത്തിലെ ജീവനക്കാരുടെ ക്ലബ്ബിൽ ആഭ്യന്തര മന്ത്രി അബ്ദുൽ അസീസ് ബിൻ സൗദ് ബിൻ നായിഫ് രാജകുമാരന്റെ രക്ഷാകർതൃത്വത്തിലാണ് ലോഞ്ച് നടന്നത്. നാഷണൽ ഇൻഫർമേഷൻ സെന്റർ ഡയറക്ടർ ഡോ. ഇസാം അൽ-വാഗൈത്, മന്ത്രാലയത്തിലെയും നാഷണൽ ഇൻഫർമേഷൻ സെന്റർ, സിവിൽ സ്റ്റാറ്റസ് ഡിപ്പാർട്ട്‌മെന്റിലെയും മുതിർന്ന ഉദ്യോഗസ്ഥരും ചടങ്ങിൽ പങ്കെടുത്തു. നാഷണൽ ഇൻഫർമേഷൻ സെന്റർ പ്രതിനിധീകരിക്കുന്ന സൗദി ഡാറ്റ ആൻഡ് ആർട്ടിഫിഷ്യൽ ഇന്റലിജൻസ് അതോറിറ്റിയുടെ (എസ്ഡിഎഐഎ) സഹകരണത്തോടെയാണ് പുതിയ സേവനങ്ങൾ ആരംഭിച്ചത്.
