കോഴിക്കോട് റെയിൽവേ സ്റ്റേഷനിൽ നിർത്തിയിട്ട ട്രെയിനിന് തീവെയ്ക്കാൻ ശ്രമം. സംഭവത്തിൽ മഹാരാഷ്ട്ര സ്വദേശിയായ യുവാവിനെ റെയിൽവേ പൊലീസ് പിടികൂടി. ഇന്ന് ഉച്ചയ്ക്ക് 2.20ന് കോഴിക്കോടെത്തിയ 22609 നമ്പർ മംഗളൂരു-കോയമ്പത്തൂർ ഇന്റർസിറ്റിക്കുള്ളിലാണ് സംഭവം.
കംപാർട്ട്മെന്റിനകത്തെ സുരക്ഷാ മുന്നറിയിപ്പ് രേഖപ്പെടുത്തിയ പ്ലാസ്റ്റിക് സ്റ്റിക്കർ പൊളിച്ചെടുത്ത് തീ കൊടുക്കാൻ ശ്രമിക്കുകയായിരുന്നു ഇയാൾ. തീവെപ്പ് ശ്രമം ശ്രദ്ധയിൽപെട്ടതിനെത്തുടർന്ന് യുവാവിനെ യാത്രക്കാർ പിടികൂടി ആർപിഎഫിന് കൈമാറുകയായിരുന്നു.
യുവാവ് മാനസിക വെല്ലുവിളി നേരിടുന്നയാളാണെന്ന് സംശയമുള്ളതായി ഉദ്യോഗസ്ഥർ പറഞ്ഞു. കഴിഞ്ഞ ദിവസം കണ്ണൂരിൽ നിർത്തിയിട്ട ട്രെയിനിലെ ഒരു ബോഗി തീയിട്ട് നശിപ്പിച്ചിരുന്നു. ഇതേത്തുടർന്ന് റെയിൽവേ ശക്തമായ പരിശോധനയാണ് സ്റ്റേഷൻ പരിസരങ്ങളിൽ നടത്തിവരുന്നത്.
