അബുദാബിയിൽ വില്ലയിലുണ്ടായ തീപിടിത്തത്തിൽ ആറു പേർ മരിച്ചു. മുഅസാസ് മേഖലയിൽ ഉണ്ടായ തീപിടുത്തത്തിൽ ഏഴ് പേർക്ക് പരിക്കേറ്റതായി യുഎഇ ക്യാപിറ്റൽ സിവിൽ ഡിഫൻസ് അറിയിച്ചു.
പരിക്കേറ്റവരിൽ രണ്ടുപേരുടെ നില ഗുരുതരമാണെന്നാണ് റിപ്പോർട്ട്. ഫയർഫോഴ്‌സും പാരാമെഡിക്കൽ ജീവനക്കാരും പോലീസും സ്ഥലത്തെത്തി തീ നിയന്ത്രണ വിധേയമാക്കി. അപകടത്തിൽ മരിച്ചവരെ സംബന്ധിച്ചുള്ള കൂടുതൽ വിവരങ്ങൾ പുറത്തുവിട്ടിട്ടില്ല.
തീപിടിത്തത്തിന്റെ കാരണം കണ്ടെത്താൻ അന്വേഷണം നടക്കുകയാണെന്ന് അതോറിറ്റി അറിയിച്ചു. കഴിഞ്ഞ മാസം, ദുബായിലെ അൽ റാസിലെ റെസിഡൻഷ്യൽ കെട്ടിടത്തിന്റെ നാലാം നിലയിലുണ്ടായ തീപിടുത്തത്തിൽ 16 പേർ മരിക്കുകയും ഒമ്പത് പേർക്ക് പരിക്കേൽക്കുകയും ചെയ്തിരുന്നു.
